Mekapati Goutham Reddy: గతంలో కన్నడ సూపర్ స్టార్ పునీత్ రాజ్ కుమార్, నేడు ఏపి మంత్రి మేకపాటి గౌతమ్ రెడ్డి ల మరణాలపై అందరూ షాక్ అయ్యారు. ఎందుకంటే వీళ్ల ఇద్దరిలో ఒక సారూప్యత ఉంది. ఇద్దరూ క్రమం తప్పకుండా జిమ్ చేస్తారు. ఫిట్ గా ఉంటారు. తమ ఆరోగ్యంపై ఎక్కువగా శ్రద్ద తీసుకుంటారు. కానీ ఇద్దరూ చిన్న వయసులోనే గుండె పోటుతో మృతి చెందడం విస్మయాన్ని, ఆందోళనను కల్గిస్తున్నాయి. వివాద రహితుడుగా పేరున్న మంత్రి మేకపాటి గౌతమ్ రెడ్డి ఆకస్మిక మరణం సోమవారం రెండు తెలుగు రాష్ట్రాల్లో తీవ్ర దిగ్భాంతికి గురి చేసింది. ఏపి యువ మంత్రుల్లో మేకపాటి గౌతమ్ రెడ్డి ఒకరు. మంత్రుల అందరిలో ఫిట్ గా ఉంటూ.. కండలు తిరిగిన వీరుడుగా.. ఆరు అడుగుల అజానుబాహుడిగా ఉండే వారు. రాష్ట్రంలో పెట్టుబడులు ఆకర్షించేందుకు ఇటీవలే దుబాయ్ కు వెళ్లిన గౌతమ్ రెడ్డి అక్కడ బిజినెస్ ఎక్క్పో లో పాల్గొని నిన్ననే ఇండియా (హైదరాబాద్)కు తిరిగి వచ్చారు. రాగానే నెల్లూరు జిల్లాలో ఓ వివాహ వేడుకకు హజరై మళ్లీ రాత్రికి హైదరాబాద్ లోని తన నివాసానికి చేరుకున్నారు.
Mekapati Goutham Reddy: ఈ రోజు ఏమి జరిగింది..?
గౌతమ్ రెడ్డి తన దిన చర్యలో భాగంగా రోజు 5.30 గంటలకే నిద్ర లేచి కాఫీ తాగి వెంటనే వ్యాయామం చేయడానికి జిమ్ కు వెళతారు. కానీ ఈ రోజు ఆలస్యంగా నిద్ర లేచారు. రాత్రి పడుకోవడం ఆలస్యం కావడంతో 7గంటల సమయంలో లేచారు. కాఫీ తాగకుండానే జిమ్ కు వెళ్లడానికి రెడీ అవుతుండగా అలసటగా ఛాతి నొప్పిగా ఉండటంతో 7.20గంటలకు ఇంట్లోని సోఫాపై కూర్చుని వెంటనే రెండు నిమిషాల్లో కుప్పకూలిపోయారు. వెంటనే ఆయనకు చెమటలు పట్టాయి. వెంటనే ఇంట్లో ఉన్న వంట మనిషి, సెక్యురిటీ సిబ్బంది అలర్ట్ అయి అంబులెన్స్ పిలిపించి జూబ్లిహిల్స్ ఆపోలో ఆసుపత్రికి తరలించారు. అయితే అంబులెన్స్ లో వెళుతున్న సమయంలోనే గౌతమ్ రెడ్డి సృహతప్పిపోయారని సమాచారం. ఆసుపత్రికి వెళ్లిన వెంటనే కార్డియాలజిస్ట్ లు, స్పెషలిస్ట్ లు అత్యవసర వైద్య సేవలు అందించినా ఫలితం కనబడలేదు. దాదాపు 90 నిమిషాల పాటు వైద్యులు ఆయనకు సిపిఆర్ చికిత్స అందించారు. కార్డియాలజిస్ట్ లు ఆయనను బ్రతికించేందుకు శత విధాలుగా ప్రయత్నించినా ఆయన శరీరం సహకరించలేదు. 9.16 గంటల ప్రాంతంలో ఆయన తుదిశ్వాస విడిచినట్లు అపోలో వైద్యులు వెల్లడించారు. ముఖ్యమంత్రి వైఎస్ జగన్మోహనరెడ్డి, ప్రతిపక్ష నేత చంద్రబాబు, ఏపి, తెలంగాణకు చెందిన పలువురు మంత్రులు, సినీ సెలబ్రిటీలు గౌతమ్ రెడ్డి భౌతికకాయాన్ని సందర్శించి నివాళులర్పించారు.
పునీత్ రాజ్ కుమార్ కూడా…
కన్నడ సినీ సెలబ్రిటీ పునీత్ రాజ్ కుమార్ కూడా గౌతమ్ రెడ్డి మాదిరిగానే నిత్యం జిమ్ చేస్తుంటారు. పిట్ గా ఉంటారు. ఆయన శరీర సౌష్టవం కూడా జిమ్ బాడీగా కనిపిస్తుంది. ఈ యువ హీరో గత ఏడాది అక్టోబర్ 29న ఉదయాన్నే జిమ్ చేస్తూనే గుండె పోటుకు గురై మరణించారు. అదే వయసు, అదే తరహా వ్యాయామపు అలవాట్లు…అదే సమయం.. అదే తరహా మరణం అందరినీ ఆందోళనకు గురి చేస్తున్నాయి.
