Balineni: తాజా మాజీ మంత్రి బాలినేని శ్రీనివాసరెడ్డి కొద్దిసేపటి క్రితం ముఖ్యమంత్రి వైఎస్ జగన్మోహనరెడ్డితో భేటీ అయ్యారు. కొత్త మంత్రి వర్గంలోకి బాలినేనిని తీసుకోకపోవడంతో ఆయన అసంతృప్తికి గురైయ్యారనీ, రాజీనామాకు సిద్దమయ్యారంటూ మీడియాలో వార్తలు వచ్చాయి. ఈ నేపథ్యంలోనే ప్రభుత్వ సలహాదారు సజ్జల రామకృష్ణారెడ్డి నిన్న ఈ రోజు బాలినేనితో సమావేశమైయ్యారు. ఒంగోలులో బాలినేని అనుచరులు నిరసన కార్యక్రమాలను నిర్వహిస్తున్నారు. నేటి నూతన మంత్రివర్గ ప్రమాణ స్వీకారానికి బాలినేని దూరంగా ఉన్నారు. ఈ తరుణంలో జగన్ ఆదేశాల మేరకు సోమవారం సాయంత్రం బాలినేని శ్రీనివాసరెడ్డి పలువురు నేతలతో కలిసి తాడేపల్లి సీఎం క్యాంప్ కార్యాలయానికి చేరుకుని జగన్ తో సమావేశమైయ్యారు. సుమారు గంట పాటు జగన్ తో భేటీ కొనసాగింది. అనంతరం బాలినేని మీడియాతో మాట్లాడారు.
తనకు ఎటువంటి అసంతృప్తి లేదని బాలినేని స్పష్టం చేశారు. మీడియాలో తప్పుడు ప్రచారం జరుగుతోందన్నారు. తాము వైఎస్ఆర్ కుటుంబానికి, జగన్ కు విధేయులమని పేర్కొన్నారు. రాజీనామా చేస్తున్నట్లు వస్తున్న వార్తలను ఆయన ఖండించారు. పార్టీ యే బాధ్యతలు అప్పగించినా స్వీకరించడానికి సిద్ధంగా ఉన్నానని చెప్పారు. ఆదిమూలపు సురేష్ తో తనకు ఎటువంటి విభేదాలు లేవని కలిసి పని చేశామన్నారు. బీసీ, ఎస్సీ, ఎస్టీ మైనార్టీ వర్గాలకు 70 శాతం మంత్రి పదవులు ఇచ్చిన ఘనత వైఎస్ఆర్ సీపీదేనని అన్నారు. సజ్జల, తాను ప్రతి వారం కలుస్తూనే ఉంటామనీ అలానే నిన్న ఈరోజు కలిశారనీ, అందులో ప్రత్యేకం ఏమిలేదన్నారు. రాబోయే ఎన్నికల్లో ప్రకాశం జిల్లాలో గతంలో వచ్చిన స్థానాలకంటే ఎక్కువగా వచ్చేలా కృషి చేస్తామని చెప్పారు. ఈ నెల 22వ తేదీన ప్రకాశం జిల్లాలో సీఎం జగన్ పర్యటన ఉందని దానిపై చర్చించినట్లు బాలినేని తెలిపారు.
బాలినేని మంత్రివర్గంలో కొనసాగించకపోవడంపై ఆయన అనుచరులు పెద్ద ఎత్తున ఆందోళనలు చేస్తున్నారు. ఒంగోలు పట్టణంలో నిన్న రాత్రి సీఎం దిష్టిబొమ్మను దగ్ధం కూడా చేశారు. పార్టీ కార్యాలయం వద్ద జగన్ కు వ్యతిరేకంగా నినాదాలు కూడా చేశారు.
