YSRCP: చీరాల వైసీపీలో పెత్తనం ఎవరిది..!? ఇద్దరు నాయకుల్లో ఎవరిని కొనసాగిస్తారు..? ఎవరిని పక్కన పెడతారు..!? ఇది వైసీపీలో అంతర్గతంగా దాదాపు ఏడాదిన్నరగా నలుగుతున్న సమస్య.. ఈ నియోజకవర్గ మార్పులపై మరో రెండు అద్దంకి, పర్చూరు కూడా ఆధారపడి ఉన్నాయి. దాదాపు ఏడాది కాలంగా ఒక పెద్ద ప్రతిపాదన వైసీపీలో చక్కర్లు కొడుతూ వస్తుంది. “చీరాల వైసీపీ ఇంఛార్జిగా బీసీ నాయకుడికి ఇచ్చేసి.. ఆమంచి కృష్ణ మోహన్ కి పర్చూరు ఇంఛార్జిగా.., కరణం వెంకటేష్ కి అద్దంకి ఇంఛార్జిగా ఇస్తారు” అనే ఆలోచన 2020 జనవరి నెలలోనే ఖరారు చేసారు, సీఎం జగన్ ఒకే చేసారు. కానీ అటు ఆమంచి, ఇటు కరణం ఇద్దరూ చీరాలను వదిలి రావడానికి సిద్ధంగా లేరు. ఏ ఒక్కరు అక్కడి నుండి వచ్చినా మిగిలిన వారు తమ తమ వర్గాలను ఇబ్బంది పెడతారని ఇద్దరిలోనూ భయం ఉంది. అది ఒకరకంగా నిజం కూడా..! ఆ నియోజకవర్గంలో పార్టీ కంటే వ్యక్తి, వర్గం, బలంపైనే ప్రస్తుత రాజకీయం నడుస్తుంది. సో.., చీరాలని వదిలితే ఇద్దరూ ఒకేసారి వదిలేసి బయటకు రావాలి. లేదా ఇద్దరూ అక్కడే ఎలాగోలా పోటీపడి ఏదో ఒకటి చేసుకోవాలి. పార్టీ కూడా అంతకు మించి ఏమి చేయలేదు..! పార్టీ పెద్దలు పదే పదే చెప్తున్నప్పటికీ ఆమంచి పర్చూరు వెళ్ళడానికి ససేమిరా అంటున్నారు. వెంకటేష్ కూడా అద్దంకికి ససేమిరా అంటున్నారు. అందుకు ఎవరి కారణాలు వారికున్నాయి, ఎవరి నమ్మకాలు వారికున్నాయి, ఎవరి బలాలు వారికున్నాయి..! కాసేపు ఈ విషయాన్నీ పక్కన పెడదాం..!
YSRCP: ఏడాదిలో ఎన్నో మారాయి..!? ఇప్పుడెలా..!?
గత ఏడాది జనవరిలో సీఎం జగన్ ఈ ప్రతిపాదనకు ఫైనల్ చేసారు. అప్పట్లోనే ఆమంచి ఆసక్తి చూపలేదు.. కానీ లోలోపల ఆలోచించడం మొదలు పెట్టారు.., కానీ.. కరణం మాత్రం అద్దంకిపై అంతగా ఆసక్తి చూపలేదు. తమను నమ్మి ఓటేసిన చీరాలకు దూరమవ్వడం ఇష్టం లేదంటూ పార్టీలో చెప్పుకొచ్చారు. ఆ డైలమా పరిస్థితి అలాగే కొనసాగుతూ ఉండగా.. మార్చిలో జరిగిన మున్సిపల్ ఎన్నికల్లో చీరాల రాజకీయం అనూహ్యంగా మారిపోయింది.. ఆ ఎన్నికల్లో ఆమంచి వర్గం బలం చాటడంతో ఆమంచికి చీరాలపై మళ్ళీ పట్టు పెరిగింది. నమ్మకం కుదిరింది. ఆయన వర్గం కూడా అప్పటి నుండి చురుకయింది. పార్టీని ధిక్కరించి పార్టీకి రెబల్ గా వేసి గెలవడం, మళ్ళీ అదే పార్టీలో చేరడం.., రెబల్ గా వేసినప్పటికీ పార్టీ పెద్దలు కూడా సీరియస్ గా ఏమి యాక్షన్ తీసుకోకపోవడంతో రెండు వర్గాల్లో మళ్ళీ పునరాలోచనలు మొదలయ్యాయి. మరోవైపు కరణం వెంకటేష్ కూడా చీరాలలో మున్సిపల్ ఎన్నికల ద్వారా తన పరిచయాలు, నెట్వర్క్, బలం, బలగం పెంచుకున్నారు. అదే క్రమంలో పార్టీ కార్యక్రమాలు, నాయకులతో మంతనాలతో చీరాలలో తిష్ట వేశారు. సో.., గతేడాది జనవరి, ఫిబ్రవరి నాటికి ఉన్న పరిస్థితులు అలా అలా మారిపోయాయి.. ఇక్కడ ఇలా ఉండగా…
- అద్దంకిలో ఏడాది కాలంలో ఇంఛార్జిగా బాచిన కృష్ణ చైతన్య బలపడ్డారు. ఇన్చార్జిగానే ఇచ్చారు, సీటు ఇస్తారో లేదో అనుమానమే.. అని కార్యకర్తలు, నాయకుల్లో కూడా ఒకరకమైన డైలమా ఉన్న సమయంలో ఇంఛార్జిగా ఈ ఏడాదిలో ఎంతో “పొలిటికల్ మెచ్యూరిటీ” చూపించారు. పార్టీకి అనుహ్యమైన ఫలితాలు అందించారు. తనలో కొత్త కోణాన్ని, తనలో కొత్త నాయకున్ని అద్దంకికి పరిచయం చేశారు. గ్రామా పంచాయతీలు, పరిషత్ లు ఏకపక్షంగా గెలిపించి.., పోటాపోటీగా జరిగిన మున్సిపల్ ఎన్నికల్లో కూడా వైసీపీని గెలిపించి రెండు రకాలుగా ఆయన ఇమేజ్ పెంచుకున్నారు. “పార్టీలో దిగువ శ్రేణులు, కార్యకర్తలు, నాయకులకు.. అటు పార్టీ పెద్దలకు కూడా తాను నియోజకవర్గంలో ధీటైన నాయకుడిని.. అనే సంకేతాలు, సాక్ష్యాలు, ఆధారాలు, ఉదాహరణలతో సహా నిరూపించారు. ఈ దెబ్బతో అద్దంకికి కరణం వెంకటేష్ ని పంపించాలి అనే ప్రతిపాదనపై పార్టీ పెద్దలు పునరాలోచనలో ఉన్న పరిస్థితి తీసుకొచ్చారు..!
- సో.., ప్రస్తుతం అయితే చీరాల సరిచేయాలంటే అక్కడున్న ఇద్దరికీ రెండు వేరే నియోజకవర్గాలు ఇవ్వాలి కాబట్టి ఆమంచికి పర్చూరు, వేంకటేష్ కి అద్దంకి అని పార్టీ ఆలోచిస్తే ఆలోచించవచ్చు గాక… కానీ దాని వలన లాభం కంటే నష్టాలే ఎక్కువగా కనిపిస్తున్నాయి. చీరాలలో ఆ రెండు వర్గాలు కలిసి పని చేయవు సరికదా.., కొత్తగా ఇంచార్జి తీసుకునే బీసీ ఇంచార్జిపై ఒత్తిడి పెరుగుతుంది. రెండు వర్గాల నుండి ఆరోపణలు, ప్రత్యారోపణలు ఉంటాయి. మరోవైపు పర్చూరులో అధికార పార్టీని నమ్ముకున్న కమ్మ, రెడ్డి క్యాడర్ కొంత డిస్టర్బ్ అవుతుంది.
- అన్నిటి కంటే ముఖ్యంగా అద్దంకిలో ఏడాదిగా నిర్మించిన కోటలు కొంత మేరకు కూలిపోతాయి. వెంకటేష్ వస్తే బాచిన కృష్ణ చైతన్య సాదర స్వాగతం పలికే అవకాశమే లేదు. వారిది ముందు తరాల శత్రుత్వం. ఇద్దరికీ బలమైన రాజకీయ పునాదులు ఉన్నాయి. వారి తండ్రులకు స్థిరమైన చరిత్ర, ముద్ర ఉంది. సో.. వారిద్దరూ ఒకే పార్టీలో మనస్ఫూర్తిగా కలిసి పనిచేయలేరు. చీరాలలో పరిష్కారం కోసం మందు వేస్తే అద్దంకిలో కొత్త సమస్య సృష్టించినట్టు అవుతుంది.. చీరాల కంటే వైసీపీకి అద్దంకి చాలా ముఖ్యం. ఇక్కడ బలమైన నాయకుడిగా ఉంటూ జగన్ గాలిని సైతం ఢీకొన్న రవికుమార్ ని వచ్చే ఎన్నికల్లో ఓడించడమే వైసీపీ పెద్దల లక్ష్యం. ఆ లక్ష్యం నెరవేరే నేపథ్యంలో ఇలా ముందు నుండి వర్గాలు పెంచుకోవడం, ఘర్షణలు, పోరు పడలేరు. అది పార్టీకి అంత మంచిది కాదు.. పైగా మంత్రి బాలినేని సహా.., పార్టీ పెద్దలు కూడా కృష్ణ చైతన్యపై నమ్మకంతో ఉన్నారు. అందుకే చీరాలలో ఎలాగూ ఈ ఇద్దరూ వినడం లేదు కాబట్టి.., అక్కడ కొన్నాళ్ళు అలాగే కొనసాగించి, అద్దంకిని మాత్రం కదపకుండా ఉంచాలనేది నిర్ణయంగా తెలుస్తుంది. అయితే ఈ లోగా చీరాలలో రెండు వర్గాల భజనపరులు.., అద్దంకిలో భజనపరులు మాత్రం సోషల్ మీడియా వేదికగా పుకార్లుని విపరీతంగా వ్యాప్తి చేసుకుంటున్నారు. నిజానికి ఈ మూడు నియోజకవర్గాలు పార్టీకి అత్యంత కీలకమైనవి. అంత ఈజీగా తేల్చలేరు. సోషల్ మీడియాలో రాసుకున్నంత సులువుగా నాయకులను మార్చలేరు. నాయకత్వాన్ని మార్పులు చేయలేరు. సున్నితమైన వర్గాలు, భావోద్వాగాలు, నమ్ముకున్న కార్యకర్తలు చాలా మంది ఉంటారు. అందుకే పుకార్లను నమ్మకుండా.., పార్టీ అధికారికంగా ప్రకటించే వరకు ఏది నమ్మకుండా ఎవరి పనుల్లో వాళ్ళు ఉండడం మూడు నియోజకవర్గాల్లో పార్టీకి మంచిది..!
