Balineni: ప్రకాశం జిల్లా ఒంగోలుకు చెందిన తాజా మాజీ మంత్రి బాలినేని శ్రీనివాసరెడ్డి ముఖ్యమంత్రి వైఎస్ జగన్మోహనరెడ్డికి అత్యంత సన్నిహితుడు, సమీప బంధువు కూడా. ఓ రకంగా వైఎస్ఆర్ కుటుంబ సభ్యుడు..! అటువంటి బాలినేని శ్రీనివాసరెడ్డిని కొన్ని అనివార్య పరిస్థితులు, కొన్ని అంతర్గత కారణాలతో మంత్రి పదవి నుండి తొలగించాల్సి వచ్చింది. ఈ పరిణామంతో బాలినేని శ్రీనివాసరెడ్డి అసంతృప్తి చెందిన మాట వాస్తవం. ఆసమ్మతి రాజేసిన మాట వాస్తవమే. అసంతృప్తి వాదులతో చర్చలు జరిపిన మాట వాస్తవం. అటువంటి బాలినేని శ్రీనివాసరెడ్డి నాలుగైదు రోజులుగా సైలెంట్ గా ఉండిపోయారు. సీఎం జగన్మోహనరెడ్డి తో చర్చించిన అనంతరం బయటకు వచ్చి మీడియాతో తనకు ఎటువంటి అసంతృప్తి లేదని చెప్పారు. ఆ తరువాత మళ్లీ ఆయన బయటకు రాలేదు. ఎక్కడ ఉన్నారో..? ఎమి చేస్తున్నారో ఎవరికీ తెలియదు. అయితే తన పార్టీ శ్రేణులకు కార్యాచరణ ప్రకటించారు. స్పష్టమైన దిశా నిర్దేశం చేశారు. అసలు ఆయన వ్యూహం ఏమిటి..? ఆయనను మంత్రి పదవి నుండి ఎందుకు తొలగించారు..? అనేది ఇప్పుడు తెలుసుకుందాం..
Balineni: బాలినేని శ్రీనివాసరెడ్డి కార్యాచరణ ఏమిటంటే..?
సీఎం జగన్ ను కలిసి వచ్చిన తరువాత హైదరాబాద్ వెళ్లిపోయారు. రేపు (సోమవారం) విజయవాడ వస్తున్నారు. సాయంత్రానికి ఒంగోలు వస్తారు. సోమవారం సాయంత్రం బాలినేనికి ప్రకాశం జిల్లాలో స్వాగతం పలికేందుకు కార్యాచరణ రెడీ అయ్యింది. దాదాపు వెయ్యి కార్లతో ఆయన కు ర్యాలీగా స్వాగతం పలకాలని ఆయన అనుచరులు, కార్యకర్తలు, ఆయన సన్నిహితులు ప్లాన్ చేసుకున్నారు. దీనికి సంబంధించి అయిదారు నియోజకవర్గాల్లోని నేతలు ఏర్పాట్లు చేస్తున్నారు. గుంటూరు జిల్లా దాటిన తరువాత ప్రకాశం జిల్లా సరిహద్దు (మార్టూరు దాటిన తరువాత) నుండి ర్యాలీగా బాలినేనికి స్వాగతం పలకనున్నారు. దీనికి జగన్మోహనరెడ్డికి సంఘీభావంగా నిలిచిన బాలినేని శ్రీనివాసరెడ్డికి ఆహ్వానం అంటూ పేరు పెట్టారు. దీనిలో అర్ధం ఏమి ఉంటుంది. జగన్మోహనరెడ్డి పార్టీ అధినేత, ముఖ్యమంత్రి. బాలినేని ఆ పార్టీకి నాయకుడు. జగన్ కు సంఘీభావంగా నిలిచిన బాలినేనికి స్వాగతం ఏమిటన్న విమర్శ వస్తుంది. ఇక ఈ నెల 22వ తేదీన ఒంగోలులో సీఎం వైఎస్ జగన్ పర్యటన ఉంది. సున్నా వడ్డీ పథకాన్ని ఒంగోలు నుండి ఆ రోజు సీఎం జగన్ ప్రారంభించనున్నారు. దీనికి ముందస్తు ఏర్పాట్లు బాలినేని శ్రీనివాసరెడ్డి చేయనున్నారు. అయితే ఒంగోలులో 22 తేదీన జరిగే కార్యక్రమంలోనే సీఎం జగన్ బాలినేనికి ఒక పదవి ప్రకటించనున్నారని వార్తలు వినబడుతున్నాయి. పార్టీకి సంబంధించి నామినేటెడ్ పదవిని జగన్ అనౌన్స్ చేయబోతున్నారుట. రాష్ట్ర స్థాయిలో కేబినెట్ ర్యాంక్ ఉండే పదవితో పాటు పార్టీలో రీజనల్ కోఆర్డినేటర్ లాంటి బాధ్యతలు అప్పగించే అవకాశం ఉంది.
సామాజికవర్గ కోణంతో పాటు
ఇక బాలినేని శ్రీనివాసరెడ్డిని మంత్రి వర్గం నుండి తొలగించడానికి పలు కారణాలు ఉన్నాయి. ఇందులో ప్రధానంగా రెడ్డి సామాజికవర్గం నుండి ముగ్గురు మంత్రులు ఉన్నారు. మృతి చెందిన మేకపాటి గౌతమ్ రెడ్డిని పక్కన బెడితే బాలినేని, బుగ్గన రాజేంద్రనాథ్ రెడ్డి, పెద్దిరెడ్డి రామచంద్రారెడ్డిలు ఉన్నారు. వీళ్ల ముగ్గురు రెడ్డి సామాజికవర్గానికి చెందిన వాళ్లను కొనసాగిస్తూ ఇతర సామాజికవర్గాల వారిని తప్పిస్తే కశ్చితంగా పార్టీలో విభేదాలు వస్తాయి. జగన్మోహనరెడ్డిని చాలా ధాటిగా విమర్శిస్తారు. రెడ్డి సామాజికవర్గం వాళ్లను దగ్గర పెట్టుకుని మిగిలిన వాళ్లను తీసేసారు అనే విమర్శ వస్తుంది. బుగ్గన, పెద్దిరెడ్డి లను తొలగించడానికి అవ్వదు. శాఖల పరంగా, రాజకీయపరంగా ఈ ఇద్దరిని కొనసాగించాల్సిన అవసరం ఉంది. దాంతో బాలినేనిని తొలగించడం తప్పనిసరి అయ్యింది. మరొక కారణంగా బాలినేనితో జిల్లాలోని పలువురు సీనియర్ నేతలతో విభేదాలు ఉన్నాయి. జగన్మోహనరెడ్డికి సమీప బంధువైన వైవీ సుబ్బారెడ్డితోనూ బాలినేనికి విబేధాలు ఉన్నాయి. ఈ విబేదాలకు తోడు జిల్లా పార్టీలో గ్రూపుల మూలంగా పార్టీ బలహీనమవుతోందని కూడా జగన్మోహనరెడ్డికి అందిన సమాచారం. వీటిన్నింటికి తోడు ఈ మూడు సంవత్సరాలుగా బాలినేని ప్రవర్తన, ఆయన అనుచరులపైనా పలు ఆరోపణలు వచ్చాయి. ఇలా అనేక రకాల కారణాల వల్ల బాలినేనిని పక్కన బెట్టాల్సి వచ్చింది. తొలుత అసంతృప్తి, అసమ్మతి వ్యక్తం చేసినా ఆ తరువాత మెత్తబడిన బాిలనేని ఇప్పుడు పార్టీ బలోపేతం కోసం పని చేస్తూ జిల్లాలో తన బలం ఏమాత్రం తగ్గలేదు అని నిరూపించుకునేలా ఈ రెండేళ్లు పని చేయనున్నారు.
