Chandrababu: వైసీపీ ప్రభుత్వ మూడేళ్లలో వేల కోట్ల అవినీతి జరిగిందనీ, టీడీపీ అధికారంలోకి రాగానే వారి అవినీతిని కక్కిస్తానని టీడీపీ అధినేత చంద్రబాబు అన్నారు. ఒంగోలులో మహానాడు ముగింపు సందర్భంగా జగన్మోహనరెడ్డి సర్కార్ పై తీవ్ర స్థాయిలో విరుచుకుపడ్డారు. జగన్ తనకు తాను కాపాడుకునేందుకు కేంద్రం చేతిలో కీలుబొమ్మగా మారాడని విమర్శించారు. రాష్ట్రంలో ఏ వర్గం సంతోషంగా లేదన్నారు. ప్రభుత్వ పలిపాలన పూర్తిగా అస్తవ్యస్తం అయిందన్నారు. అమరావతిని చంపేశాడు, పోలవరం పూర్తి అవుతుందన్న నమ్మకం లేదన్నారు. ఎన్టీఆర్ హయాంలో వ్యవసాయ మోటార్లకు విద్యుత్ మీటర్లు తొలగిస్తే జగన్ వచ్చి మీటర్లు పెడుతున్నారన్నారు. కేంద్రం మెడలు వంచి ప్రత్యేక హోదా తెస్తానన్న జగన్ .. ఇప్పుడు కేంద్రం కాళ్ల మీద పడే పరిస్థితి దాపురించిందని విమర్శించారు.
టీడీపీ అధికారంలోకి వచ్చిన తరువాత ప్రజాభీష్టంకు అనుగుణంగా జిల్లాల విభజన పై పునః సమీక్ష చేసి నిర్ణయం తీసుకుంటామన్నారు. మార్కాపురంను జిల్లా చేయాలన్న డిమాండ్ ను జగన్ ప్రభుత్వం పట్టించుకోలేదని అన్నారు. అద్దంకి, కందుకూరు నియోజకవర్గాల ప్రజలు ప్రకాశం జిల్లాలోనే ఉండాలని కోరుకున్నారని చంద్రబాబు చెప్పారు. గాడితప్పిన రాష్ట్రాన్ని గాడిలో పెడతామని అన్నారు చంద్రబాబు సీఎం జగన్ ను త్వరగా ఇంటికి పంపాలన్న కసి ప్రజల్లో ఉందన్నారు. క్విట్ జగన్ – సేవ్ ఆంధ్రప్రదేశ్ అని అయిదు కోట్ల మంది ప్రజలు కోరుకుంటున్నారన్నారు. బాదుడే బాదుడు కార్యక్రమాన్ని టీడీపీ నిర్వహిస్తుంటే పోటీగా గడప గడపకు ప్రభుత్వం అని నిర్వహించారనీ, గడప గడపకు వెళుతున్న మంత్రులు, ఎమ్మెల్యేలను ప్రజలు నిలదీస్తున్నారన్నారు. రకరకాలుగా అడ్డంకులు సృష్టించినా ప్రజలు, పార్టీ శ్రేణులు, అభిమానులు పెద్ద ఎత్తున మహానాడుకు తరలివచ్చారని ఇదే నిదర్శనమని అన్నారు. జగన్ కు ఈ రోజు నిద్ర రాదని చంద్రబాబు వ్యాఖ్యానించారు.
ఎన్టీఆర్ శతజయంతి వేడుకలను పురస్కరించుకుని సంవత్సరం మొత్తం పార్టీ పరంగా కార్యక్రమాలు చేపడతామన్నారు. ఆయన ఆశయాలను ప్రజల్లోకి తీసుకువెళ్లాలని తెలిపారు. ఇందు కోసం ప్రత్యేకంగా ప్రతి జిలాల్లో మహనాడు పెడతామన్నారు. వైసీపీ ప్రభుత్వ ప్రజా వ్యతిరేక, అవినీతి విధానాలను ఎండగట్టేందుకు ముందుకు వెళ్దామన్నారు. రాజకీయ నేరగాళ్లు వచ్చారని హెచ్చరించారు. వైసీపీ ప్రభుత్వం 8 వేల కోట్లు అప్పు చేసిందనీ, సంక్షేమ పథకాల పేరిట లక్షల కోట్లు దోచుకున్నారని విమర్శించారు. ఈ అప్పును జగన్ చెల్లిస్తారా అని ప్రశ్నించారు చంద్రబాబు. క్వార్టర్ బాటిల్ మందు ధర రూ.9లు ఉండేది దాన్ని ఈ ప్రభుత్వం రూ.21లు చేసిందన్నారు. అందులో 12 రూపాయలు జగన్ జేబులోకి వెళుతున్నాయని ఆరోపించారు. నాసిరకం మద్యం వల్ల ఎందరో ప్రాణాలు కోల్పోతున్నారన్నారు. వేలాది ఎకరాలు కబ్జాలు చేశారని విమర్శించారు. ఈ ప్రభుత్వ హయాంలో జరిగిన అవినీతిని వెలికి తీస్తామని, ఎవరినీ ఉపేక్షించేది లేదని చంద్రబాబు అన్నారు. జగన్ ప్రభుత్వానికి ఉరివేసి బంగాళాఖాతంలో కలపాలని చంద్రబాబు అన్నారు.
