Divyavani: తెలుగుదేశం పార్టీ సభ్యత్వానికి, పార్టీ అధికార ప్రతినిధి పదవికి సినీ నటి దివ్యవాణి రాజీనామా చేశారు. తన రాజీనామా లేఖను పార్టీ అధినేత చంద్రబాబుకు పంపిన దివ్యవాణి కీలక వ్యాఖ్యలు చేశారు. రాజీనామా లేఖలో మాత్రం తన వ్యక్తిగత కారణాలు అని పేర్కొన్నప్పటికీ మీడియా సమావేశంలో పార్టీ కార్యాలయంలో రాజకీయాలను ప్రస్తావించారు. ఇటీవల రాజీనామా చేస్తున్నట్లు సోషల్ మీడియాలో పోస్టు చేసి తర్వాత దాన్ని ఆమె డిలీట్ చేసిన విషయం తెలిసిందే. ఈ క్రమంలో దివ్యవాణి బుధవారం రాత్రి చంద్రబాబుతో భేటీ అయ్యారు. ఆ తరువాత కొద్దిసేపటికే తను పార్టీకి రాజీనామా చేస్తున్నట్లు సెల్ఫీ వీడియో విడుదల చేశారు. గురువారం మీడియా సమావేశంలో మాట్లాడుతూ కొంత కాలంగా పార్టీ అన్ని కార్యక్రమాలకు దూరం పెడుతూ వస్తున్నారని, పార్టీలో అవమానాలకు తట్టుకోలేకనే పార్టీకి రాజీనామా చేస్తున్నట్లు తెలిపారు. మీడియా సమావేశం పెట్టేందుకు కూడా ఎవరూ సహకరించడం లేదని దివ్యవాణి ఆవేదన వ్యక్తం చేశారు.
అధినేత చంద్రబాబును కలిసి వివరించే ప్రయత్నం చేసినా కొందరు అడ్డుకుంటున్నారని ఆరోపించారు. ఓ దశలో దివ్యవాణి భావోద్వేగానికి గురై కన్నీళ్లు పెట్టుకున్నారు. తన లాగా పార్టీలో ఇబ్బందులు పడేవారు చాలా మంది ఉన్నారు, కానీ వాళ్లకు పదవులు అవసరం కాబట్టి అలా ఉంటున్నారని దివ్యవాణి అన్నారు. గౌరవం లేని చోట ఉండలేనని ఆమె స్పష్టం చేశారు. చంద్రబాబును కలిసి మాట్లాడేందుకు బుధవారం పార్టీ ఆఫీసుకు వెళితే గంటల తరబడి నిరీక్షించాల్సి వచ్చిందని దివ్యవాణి అవేదన వ్యక్తం చేశారు. చంద్రబాబు సతీమణిని విమర్శిస్తే..అందరికంటే ముందు తానే కౌంటర్ ఇచ్చానని గుర్తు చేశారు. సినీ రంగంలో బాలకృష్ణ కంటే తానే పెద్ద నటినని పేర్కొన్నారు. టీడీపీలోకి సినీ రంగం నుండి వచ్చిన అనేక మంది ఇమడలేక బయటకు వెళ్లిపోయారంటూ జయప్రద, జయసుధ, ఆలీ, రోజా పేర్లను ప్రస్తావిస్తూ ఇప్పుడు తన వంతు వచ్చిందన్నారు. ఈ సందర్భంగా పార్టీ కార్యాలయంలో జరుగుతున్న అంతర్గత రాజకీయాలను తీవ్ర స్థాయిలో విమర్శించారు దివ్యవాణి.
